wafa ke nam pe zahrab ek aur sahi

vafā ke naam pe zahrāb ek aur sahī

bikhar ga.e haiñ ka.ī ḳhvāb ek aur sahī

bujhe bujhe ka.ī manzar haiñ dīda-e-tar meñ

ye Dūbtā huā mahtāb ek aur sahī

jalā ke ek diyā ham ne aur dekh liyā

dhuāñ dhuāñ sī ye mehrāb ek aur sahī

lagī hai bhiiḌ safīna Dubone vāloñ kī

tamāsha koī sar-e-āb ek aur sahī

tumhāre baa'd har ik shai ḳhafā hī thī ham se

ye be-niyāzī-e-ahbāb ek aur sahī

takallufāt se bhī log kaam lete haiñ

ḳhafā jo hai use ādāb ek aur sahī

kabhī to aa.egā us ko 'ra.ūf' apnā ḳhayāl

shikāyat-e-dil-e-be-tāb ek aur sahī

wafa ke nam pe zahrab ek aur sahi

bikhar gae hain kai KHwab ek aur sahi

bujhe bujhe kai manzar hain dida-e-tar mein

ye Dubta hua mahtab ek aur sahi

jala ke ek diya hum ne aur dekh liya

dhuan dhuan si ye mehrab ek aur sahi

lagi hai bhiD safina Dubone walon ki

tamasha koi sar-e-ab ek aur sahi

tumhaare ba'd har ek shai KHafa hi thi hum se

ye be-niyazi-e-ahbab ek aur sahi

takallufat se bhi log kaam lete hain

KHafa jo hai use aadab ek aur sahi

kabhi to aaega us ko 'rauf' apna KHayal

shikayat-e-dil-e-be-tab ek aur sahi