wafa KHulus mohabbat ki raushni ke charagh

vafā ḳhulūs mohabbat kī raushnī ke charāġh

hamesha maiñ ne jalā.e haiñ dostī ke charāġh

ye mat samajhnā ke āsān kaam hotā hai

jigar ke ḳhuun se jalte haiñ zindagī ke charāġh

diloñ se himmat-e-mardāñ nikāl dete haiñ

ajiib qism ke hote haiñ buzdilī ke charāġh

huī jo ishq kī me.arāj ho gayā ma.alūm

uThā ke mushkileñ jalte haiñ āshiqī ke charāġh

suḳhan-sarā.ī meñ hotī nahīñ mujhe diqqat

mire dimāġh meñ jalte haiñ shā.erī ke charāġh

koī kisī kī madad ke liye nahīñ aatā

jalāne paḌte haiñ az-ḳhud hī zindagī ke charāġh

maiñ ek arse se ranj-o-alam kī qaid meñ huuñ

ḳhudāyā kar de atā mujh ko ab ḳhushī ke charāġh

nahīñ hai ḳhvāhish-e-jannat mujhe mire maulā

mirī lahad meñ jalā denā bas alī ke charāġh

ḳhudā se hotī hai qurbat isī liye 'afzal'

havā kī tezī se Darte nahīñ valī ke charāġh

wafa KHulus mohabbat ki raushni ke charagh

hamesha main ne jalae hain dosti ke charagh

ye mat samajhna ke aasan kaam hota hai

jigar ke KHun se jalte hain zindagi ke charagh

dilon se himmat-e-mardan nikal dete hain

ajib qism ke hote hain buzdili ke charagh

hui jo ishq ki mearaj ho gaya malum

uTha ke mushkilen jalte hain aashiqi ke charagh

suKHan-sarai mein hoti nahin mujhe diqqat

mere dimagh mein jalte hain shaeri ke charagh

koi kisi ki madad ke liye nahin aata

jalane paDte hain az-KHud hi zindagi ke charagh

main ek arse se ranj-o-alam ki qaid mein hun

KHudaya kar de ata mujh ko ab KHushi ke charagh

nahin hai KHwahish-e-jannat mujhe mere maula

meri lahad mein jala dena bas ali ke charagh

KHuda se hoti hai qurbat isi liye 'afzal'

hawa ki tezi se Darte nahin wali ke charagh