wafa ki rah mein dushwar go safar bhi nahin

vafā kī raah meñ dushvār go safar bhī nahīñ

hazār sahl sahī lekin is qadar bhī nahīñ

mah-o-nujūm kī duniyā sajī huī hai magar

fasāna ġham kā mire itnā muḳhtasar bhī nahīñ

judā maiñ ḳhud se karūñ tujh ko kis tarah ummīd

tire sivā to mirā koī ham-safar bhī nahīñ

ye kaisā dasht hai kaisā safar hai muddat se

sulagtī ret nahīñ dhuup kā shajar bhī nahīñ

zabāñ se apnī kahūñ dil pe jo guzartī hai

vo be-ḳhabar hī sahī itne be-ḳhabar bhī nahīñ

jo zaḳhm khaa.e haiñ 'sattār' vo dikhā.ūñ bhī

vafā-shanās nahīñ huuñ to be-hunar bhī nahīñ

wafa ki rah mein dushwar go safar bhi nahin

hazar sahl sahi lekin is qadar bhi nahin

mah-o-nujum ki duniya saji hui hai magar

fasana gham ka mere itna muKHtasar bhi nahin

juda main KHud se karun tujh ko kis tarah ummid

tere siwa to mera koi ham-safar bhi nahin

ye kaisa dasht hai kaisa safar hai muddat se

sulagti ret nahin dhup ka shajar bhi nahin

zaban se apni kahun dil pe jo guzarti hai

wo be-KHabar hi sahi itne be-KHabar bhi nahin

jo zaKHm khae hain 'sattar' wo dikhaun bhi

wafa-shanas nahin hun to be-hunar bhi nahin