wafa ki rah mein dushwariyan bahut si hain

vafā kī raah meñ dushvāriyāñ bahut sī haiñ

magar junūñ kī bhī tayyāriyāñ bahut sī haiñ

jalāl apnī mohabbat kā sab se ūñchā hai

badan meñ aise to bīmāriyāñ bahut sī haiñ

hamāre paas faqat dil kā dard hai lekin

tumhāre paas to ayyāriyāñ bahut sī haiñ

har ek shaḳhs kī fikreñ judā judā Thahrīñ

jahān-e-ām meñ ḳhuddāriyāñ bahut sī haiñ

vafā kī saarī misāleñ ginā to duuñ lekin

vatan meñ apne bhī ġhaddāriyāñ bahut sī haiñ

diloñ meñ palte hue ḳhvāb jānte hī nahīñ

tabāh karne ko be-kāriyāñ bahut sī haiñ

kisī ne mujh se kahā thā ki yaar sun to sahī

adā meñ husn kī makkāriyāñ bahut sī haiñ

sajī hai bazm-e-mohabbat ye jaan kis ke liye

yahāñ to logoñ meñ bezāriyāñ bahut sī haiñ

'nadīm' kyuuñ tū tah-e-iztirāb Duub gayā

diloñ ke khel meñ bhī pāriyāñ bahut sī haiñ

wafa ki rah mein dushwariyan bahut si hain

magar junun ki bhi tayyariyan bahut si hain

jalal apni mohabbat ka sab se uncha hai

badan mein aise to bimariyan bahut si hain

hamare pas faqat dil ka dard hai lekin

tumhaare pas to ayyariyan bahut si hain

har ek shaKHs ki fikren juda juda Thahrin

jahan-e-am mein KHuddariyan bahut si hain

wafa ki sari misalen gina to dun lekin

watan mein apne bhi ghaddariyan bahut si hain

dilon mein palte hue KHwab jaante hi nahin

tabah karne ko be-kariyan bahut si hain

kisi ne mujh se kaha tha ki yar sun to sahi

ada mein husn ki makkariyan bahut si hain

saji hai bazm-e-mohabbat ye jaan kis ke liye

yahan to logon mein bezariyan bahut si hain

'nadim' kyun tu tah-e-iztirab Dub gaya

dilon ke khel mein bhi pariyan bahut si hain