wafa ki rah mein jo naqd-e-jaan luTa aae

vafā kī raah meñ jo naqd-e-jāñ luTā aa.e

lab-e-zamāna ne vo chand naam dohrā.e

jab ik bhī lamha ḳhushī kā na apne paas aa.e

ḳhudā bachā.e ham is zindagī se bhar paa.e

tulū-e-sub.h-e-mohabbat kā intizār rahā

magar vatan meñ to kuchh aur baḌh ga.e saa.e

futūr-e-niyyat-e-sāqī se nibh na saktī thī

ham apne jaam ko maiḳhāne hī meñ toḌ aa.e

ḳharāb haal the phir bhī bachā.ī ḳhud-dārī

na haath joḌe kahīñ aur na haath phailā.e

hazār haif ki dil ke kahe ko Taal diyā

us ek bhuul pe ham laakh baar pachhtā.e

ajiib baat hai apnoñ ne kī na kuchh bhī madad

jo ġhair the vahī baḌh chaḌh ke mere kaam aa.e

ḳhudā-e-pāk ne kar lī qubūl merī duā

jab ashk bahte ga.e aur hoñT tharrā.e

har ek shaḳhs ko da.avā hai hosh-mandī kā

ye haal ho to bhalā kaun kis ko samjhā.e

jahāñ se uTh ga.e ‘josh’-o-‘jigar’ se 'anvar' se

koī jo laa.e to arz-e-hunar ko kyā laa.e

jadīd daur-e-zavāl-e-ġhazal meñ bhī 'maġhmūm

hamīñ ne husn-e-taġhazzul ke phuul barsā.e

wafa ki rah mein jo naqd-e-jaan luTa aae

lab-e-zamana ne wo chand nam dohrae

jab ek bhi lamha KHushi ka na apne pas aae

KHuda bachae hum is zindagi se bhar pae

tulu-e-subh-e-mohabbat ka intizar raha

magar watan mein to kuchh aur baDh gae sae

futur-e-niyyat-e-saqi se nibh na sakti thi

hum apne jam ko maiKHane hi mein toD aae

KHarab haal the phir bhi bachai KHud-dari

na hath joDe kahin aur na hath phailae

hazar haif ki dil ke kahe ko Tal diya

us ek bhul pe hum lakh bar pachhtae

ajib baat hai apnon ne ki na kuchh bhi madad

jo ghair the wahi baDh chaDh ke mere kaam aae

KHuda-e-pak ne kar li qubul meri dua

jab ashk bahte gae aur honT tharrae

har ek shaKHs ko dawa hai hosh-mandi ka

ye haal ho to bhala kaun kis ko samjhae

jahan se uTh gae ‘josh’-o-‘jigar’ se 'anwar' se

koi jo lae to arz-e-hunar ko kya lae

jadid daur-e-zawal-e-ghazal mein bhi 'maghmum

hamin ne husn-e-taghazzul ke phul barsae