wafa mein barabar jise tol lenge

vafā meñ barābar jise tol leñge

use saltanat bech kar mol leñge

ijāzat agar sar paTakne kī hogī

muqaffal dar-e-yār ham khol leñge

tabībo na baḳhshe kī sehat ThanD aa.e

na jab tak ki zahr is meñ ham ghol leñge

kisī din jo palTā muqaddar hamārā

bike jis ke hāthoñ use mol leñge

guloñ se na hogī jo uqda-kushā.ī

girah dil ke kāñTe se ham khol leñge

hameñ baaġh jaane se ye mudda.ā hai

zarā bulbul-o-gul se hañs bol leñge

rihā.ī na deñge vo qaid-e-sitam se

na jab tak merī jaan ko ol leñge

badan kyuuñ chhupāte ho zevar pahan kar

javāhar ke ikke na ham khol leñge

abhī ham se aur un se sohbat na.ī hai

jo muñh lag chaleñge to hañs-bol leñge

ġham-e-yār bhī abr-e-naisāñ hai ai 'bahr'

jo Tapkeñge aañsū guhar rol leñge

wafa mein barabar jise tol lenge

use saltanat bech kar mol lenge

ijazat agar sar paTakne ki hogi

muqaffal dar-e-yar hum khol lenge

tabibo na baKHshe ki sehat ThanD aae

na jab tak ki zahr is mein hum ghol lenge

kisi din jo palTa muqaddar hamara

bike jis ke hathon use mol lenge

gulon se na hogi jo uqda-kushai

girah dil ke kanTe se hum khol lenge

hamein bagh jaane se ye muddaa hai

zara bulbul-o-gul se hans bol lenge

rihai na denge wo qaid-e-sitam se

na jab tak meri jaan ko ol lenge

badan kyun chhupate ho zewar pahan kar

jawahar ke ikke na hum khol lenge

abhi hum se aur un se sohbat nai hai

jo munh lag chalenge to hans-bol lenge

gham-e-yar bhi abr-e-naisan hai ai 'bahr'

jo Tapkenge aansu guhar rol lenge