wafa mein paikar-e-isar banna kitna mushkil hai

vafā meñ paikar-e-īsār banñā kitnā mushkil hai

kisī ke pyaar kā haqdār banñā kitnā mushkil hai

masā.il har qabīle ke samajh lenā to hai āsāñ

qabīle kā magar sardār banñā kitnā mushkil hai

tasādum hai yahāñ bāham mafādāt-e-ḳhusūsī haiñ

yahāñ par ġhair-jānib-dār banñā kitnā mushkil hai

jahāñ par jabr-e-hākim se sabhī kī gardaneñ ḳham hoñ

vahāñ par sāhab-e-dastār banñā kitnā mushkil hai

bahut āsān hai sho.aloñ kā phūloñ meñ badal jaanā

ḳhud apnī aag meñ gulzār banñā kitnā mushkil hai

ġhamoñ ke rang se ḳhushiyoñ ke ḳhāke ham banāte haiñ

hameñ mālūm hai fankār banñā kitnā mushkil hai

ham apne ahd ke bachchoñ ko itnā to batā.eñge

binā mehnat kiye zardār banñā kitnā mushkil hai

uThāne ko ye dīvāreñ to 'sīmā' sab uThā leñge

magar ik sāya-e-dīvār banñā kitnā mushkil hai

wafa mein paikar-e-isar banna kitna mushkil hai

kisi ke pyar ka haqdar banna kitna mushkil hai

masail har qabile ke samajh lena to hai aasan

qabile ka magar sardar banna kitna mushkil hai

tasadum hai yahan baham mafadat-e-KHususi hain

yahan par ghair-jaanib-dar banna kitna mushkil hai

jahan par jabr-e-hakim se sabhi ki gardanen KHam hon

wahan par sahab-e-dastar banna kitna mushkil hai

bahut aasan hai shoalon ka phulon mein badal jaana

KHud apni aag mein gulzar banna kitna mushkil hai

ghamon ke rang se KHushiyon ke KHake hum banate hain

hamein malum hai fankar banna kitna mushkil hai

hum apne ahd ke bachchon ko itna to bataenge

bina mehnat kiye zardar banna kitna mushkil hai

uThane ko ye diwaren to 'sima' sab uTha lenge

magar ek saya-e-diwar banna kitna mushkil hai