wafa se aashna koi nahin hai

vafā se āshnā koī nahīñ hai

agarche bevafā koī nahīñ hai

ḳhudā hai aur tūfāñ meñ safīna

hamārā nāḳhudā koī nahīñ hai

fasānoñ kī taraf maa.il hai duniyā

haqīqat-āshnā koī nahīñ hai

vahāñ tak is bashar kī hai rasā.ī

jahāñ tere sivā koī nahīñ hai

baḌhī jaatī hai apnī dhun meñ duniyā

palaT kar dekhtā koī nahīñ hai

abhī gulshan kā hai māhaul achchhā

abhī pattā harā koī nahīñ hai

mohabbat ḳhud davā hai zindagī kī

mohabbat kī davā koī nahīñ hai

junūñ kī ibtidā hai hosh-mandī

junūñ kī intihā koī nahīñ hai

nigāhoñ kī hadoñ meñ sirf tū hai

nazar meñ dūsrā koī nahīñ hai

vo kuchh bhī ho 'la.īq' insāñ na hogā

agar us se ḳhafā koī nahīñ hai

wafa se aashna koi nahin hai

agarche bewafa koi nahin hai

KHuda hai aur tufan mein safina

hamara naKHuda koi nahin hai

fasanon ki taraf mail hai duniya

haqiqat-ashna koi nahin hai

wahan tak is bashar ki hai rasai

jahan tere siwa koi nahin hai

baDhi jati hai apni dhun mein duniya

palaT kar dekhta koi nahin hai

abhi gulshan ka hai mahaul achchha

abhi patta hara koi nahin hai

mohabbat KHud dawa hai zindagi ki

mohabbat ki dawa koi nahin hai

junun ki ibtida hai hosh-mandi

junun ki intiha koi nahin hai

nigahon ki hadon mein sirf tu hai

nazar mein dusra koi nahin hai

wo kuchh bhi ho 'laiq' insan na hoga

agar us se KHafa koi nahin hai