wafa-shiar ko tu ne zalil-o-KHwar kiya

vafā-shi.ār ko tū ne zalīl-o-ḳhvār kiyā

jafā-parast ye kyā sheva iḳhtiyār kiyā

uThā.e se na uThā dil kā parda-e-ġhaflat

ḳhatā huī ki un āñkhoñ pe e.atibār kiyā

nigāh-e-mast-e-haqīqat to de chukī thī javāb

magar ye dil hī thā phir us ne hoshiyār kiyā

na vo taḌap rahī dil meñ na vo rahī sozish

ilaaj kyā thā ye kyā tū ne ġham-gusār kiyā

dikhā ke jalva-e-bātil kī ik jhalak ai husn

ḳhudā ke banda ko nāhaq gunāhgār kiyā

kisī ke bas kā dil-e-muztarib na thā lekin

hamīñ ne ḳhūgar-e-andoh-e-intizār kiyā

ḳhayāl-e-ishq ne rahmat se bhī rakhā mahrūm

ye kyā kiyā ki gunāhoñ pe e.atibār kiyā

kahe meñ aa ke dil-e-nā-subūr ke ham ne

tamām shab tire aane kā intizār kiyā

tumheñ to ḳhaak meñ milnā thā mil ga.e āḳhir

jahāñ meñ shauq abas un ko sharmsār kiyā

wafa-shiar ko tu ne zalil-o-KHwar kiya

jafa-parast ye kya shewa iKHtiyar kiya

uThae se na uTha dil ka parda-e-ghaflat

KHata hui ki un aankhon pe eatibar kiya

nigah-e-mast-e-haqiqat to de chuki thi jawab

magar ye dil hi tha phir us ne hoshiyar kiya

na wo taDap rahi dil mein na wo rahi sozish

ilaj kya tha ye kya tu ne gham-gusar kiya

dikha ke jalwa-e-baatil ki ek jhalak ai husn

KHuda ke banda ko nahaq gunahgar kiya

kisi ke bas ka dil-e-muztarib na tha lekin

hamin ne KHugar-e-andoh-e-intizar kiya

KHayal-e-ishq ne rahmat se bhi rakha mahrum

ye kya kiya ki gunahon pe eatibar kiya

kahe mein aa ke dil-e-na-subur ke hum ne

tamam shab tere aane ka intizar kiya

tumhein to KHak mein milna tha mil gae aaKHir

jahan mein shauq abas un ko sharmsar kiya