wafaen uske dar par DhunDhta hun

vafā.eñ us ke dar par DhūñDhtā huuñ

maiñ sahrā meñ samundar DhūñDhtā huuñ

na hoñ jis meñ judā patte shajar se

koī aisā december DhūñDhtā huuñ

vo mere paas hai jaane kahāñ hai

maiñ us ko saath le kar DhūñDhtā huuñ

ho jis kā fe’l us ke qaul jaisā

maiñ ik aisā suḳhanvar DhūñDhtā huuñ

mire andar añdherā hai balā kā

koī ḳhurshīd-paikar DhūñDhtā huuñ

khaḌā rahtā huuñ ā.īne ke aage

maiñ apnā aap aksar DhūñDhtā huuñ

furāt-e-ashk āñkhoñ meñ sajā kar

lab-e-dariyā bahattar DhūñDhtā huuñ

talāsh us kī ne pāgal kar diyā hai

vo andar hai maiñ bāhar DhūñDhtā huuñ

musalsal qatl hotā huuñ maiñ 'sāgar'

kabhī baazū kabhī sar DhūñDhtā huuñ

wafaen us ke dar par DhunDhta hun

main sahra mein samundar DhunDhta hun

na hon jis mein juda patte shajar se

koi aisa december DhunDhta hun

wo mere pas hai jaane kahan hai

main us ko sath le kar DhunDhta hun

ho jis ka fe’l us ke qaul jaisa

main ek aisa suKHanwar DhunDhta hun

mere andar andhera hai bala ka

koi KHurshid-paikar DhunDhta hun

khaDa rahta hun aaine ke aage

main apna aap aksar DhunDhta hun

furaat-e-ashk aankhon mein saja kar

lab-e-dariya bahattar DhunDhta hun

talash us ki ne pagal kar diya hai

wo andar hai main bahar DhunDhta hun

musalsal qatl hota hun main 'sagar'

kabhi bazu kabhi sar DhunDhta hun