wahan hain apni KHud-araiyan hijab nahin

vahāñ haiñ apnī ḳhud-ārā.iyāñ hijāb nahīñ

maqām-e-jalva hai parda nahīñ naqāb nahīñ

maiñ jis jahān meñ huuñ māh-o-āftāb nahīñ

taġhayyurāt nahīñ koī inqalāb nahīñ

hijāb-e-ahl-e-nazar hai faroġh-e-husn tirā

jo be-naqāb bhī tū hai to be-naqāb nahīñ

vo laakh chhupte magar ham to dekh hī lete

hamārī aañkh jahāñ hai vahāñ hijāb nahīñ

mai-e-majāz-o-haqīqat kā nashsha ho jis meñ

hamāre jām-e-sifālī meñ vo sharāb nahīñ

tamām raat paḌā karvaTeñ badaltā huuñ

jo mere sāmne vo chashm-e-nīm-ḳhvāb nahīñ

likhe hue haiñ vo sab haath se farishtoñ ke

mire gunāhoñ kā kyūñkar kahūñ hisāb nahīñ

bikher zulf-e-siyah ko na rū-e-raushan par

chhupā.e abr jise ye vo āftāb nahīñ

abhī hai naaz uThāne kā hausla baaqī

ki dil vahī hai agar mausam-e-shabāb nahīñ

ye un kī uThtī javānī kī ik haqīqat hai

ulaT na de jo qayāmat ko vo shabāb nahīñ

lagī hai kaisī ye chup tum ko ai adam vaalo

kisī savāl kā mere koī javāb nahīñ

nazar-navāz adā.eñ haiñ husn-e-ḳhud-bīñ kī

hayā kā shā.iba jin meñ nahīñ hijāb nahīñ

qadam sañbhāl ke rakh pā.emāl ho na koī

zamīn-e-gor-e-ġharībāñ hai farsh-e-ḳhvāb nahīñ

nazar-fareb hai duniyā-e-dūñ kā nazzāra

tilism-e-vahm-o-gumāñ hai faqat sarāb nahīñ

azal se vaqf-e-taġhayyur nizām-e-hastī hai

zamāna rang dikhātā hai inqalāb nahīñ

kuchh aaj lazzat-e-dard-e-jigar kā lutf milā

huā sukūn to kyā kuchh ab iztirāb nahīñ

fidā-e-nām-e-mubārak hai 'shād' suufī bhī

kahe na koī sanā-ḳhvān-e-bū-turāb nahīñ

wahan hain apni KHud-araiyan hijab nahin

maqam-e-jalwa hai parda nahin naqab nahin

main jis jahan mein hun mah-o-aftab nahin

taghayyuraat nahin koi inqalab nahin

hijab-e-ahl-e-nazar hai farogh-e-husn tera

jo be-naqab bhi tu hai to be-naqab nahin

wo lakh chhupte magar hum to dekh hi lete

hamari aankh jahan hai wahan hijab nahin

mai-e-majaz-o-haqiqat ka nashsha ho jis mein

hamare jam-e-sifali mein wo sharab nahin

tamam raat paDa karwaTen badalta hun

jo mere samne wo chashm-e-nim-KHwab nahin

likhe hue hain wo sab hath se farishton ke

mere gunahon ka kyunkar kahun hisab nahin

bikher zulf-e-siyah ko na ru-e-raushan par

chhupae abr jise ye wo aaftab nahin

abhi hai naz uThane ka hausla baqi

ki dil wahi hai agar mausam-e-shabab nahin

ye un ki uThti jawani ki ek haqiqat hai

ulaT na de jo qayamat ko wo shabab nahin

lagi hai kaisi ye chup tum ko ai adam walo

kisi sawal ka mere koi jawab nahin

nazar-nawaz adaen hain husn-e-KHud-bin ki

haya ka shaiba jin mein nahin hijab nahin

qadam sanbhaal ke rakh paemal ho na koi

zamin-e-gor-e-ghariban hai farsh-e-KHwab nahin

nazar-fareb hai duniya-e-dun ka nazzara

tilism-e-wahm-o-guman hai faqat sarab nahin

azal se waqf-e-taghayyur nizam-e-hasti hai

zamana rang dikhata hai inqalab nahin

kuchh aaj lazzat-e-dard-e-jigar ka lutf mila

hua sukun to kya kuchh ab iztirab nahin

fida-e-nam-e-mubarak hai 'shad' sufi bhi

kahe na koi sana-KHwan-e-bu-turab nahin