wahi hai tarz-e-taghaful wahi hai KHu mujh mein

vahī hai tarz-e-taġhāful vahī hai ḳhū mujh meñ

utar gayā ho vo jaise ki hū-ba-hū mujh meñ

maiñ manziloñ ko bhī ab rahguzar samajhtā huuñ

kahāñ se umḌā hai ye shauq-e-justujū mujh meñ

rahegā zindagī pe faḳhr tā-dam-e-āḳhir

agar jhalaktī rahī shān-e-ābrū mujh meñ

ḳhushī yahī hai bil-āḳhir kisī ke kaam aa.e

bachā huā hai jo ik buuñd bhar lahū mujh meñ

agarche mai-kade meñ jā sakā na muddat se

basā hai ab bhī magar shor-e-hā-o-hū mujh meñ

ye kis ke dam se charāġhāñ hai merī bazm-e-ḳhayāl

ye kaun kartā hai chhup-chhup ke guftugū mujh meñ

kisī tarah se mirī bartarī na ho paa.ī

ḳhayāl-e-dost bhī ban kar rahā adū mujh meñ

mujhe yaqīn hai vo din zarūr aa.egā

ki jab maiñ tujh meñ samā.ūñgā aur tū mujh meñ

banā hai marja.a-e-ahbāb ghar mirā 'gauhar'

dar aa.ī mehr-o-mohabbat kī jab se bū mujh meñ

wahi hai tarz-e-taghaful wahi hai KHu mujh mein

utar gaya ho wo jaise ki hu-ba-hu mujh mein

main manzilon ko bhi ab rahguzar samajhta hun

kahan se umDa hai ye shauq-e-justuju mujh mein

rahega zindagi pe faKHr ta-dam-e-aKHir

agar jhalakti rahi shan-e-abru mujh mein

KHushi yahi hai bil-aKHir kisi ke kaam aae

bacha hua hai jo ek bund bhar lahu mujh mein

agarche mai-kade mein ja saka na muddat se

basa hai ab bhi magar shor-e-ha-o-hu mujh mein

ye kis ke dam se charaghan hai meri bazm-e-KHayal

ye kaun karta hai chhup-chhup ke guftugu mujh mein

kisi tarah se meri bartari na ho pai

KHayal-e-dost bhi ban kar raha adu mujh mein

mujhe yaqin hai wo din zarur aaega

ki jab main tujh mein samaunga aur tu mujh mein

bana hai marja-e-ahbab ghar mera 'gauhar'

dar aai mehr-o-mohabbat ki jab se bu mujh mein