wahi ijz-e-bandagi hai wahi naz-e-astana

vahī ijz-e-bandagī hai vahī nāz-e-āstāna

maiñ yaqīn kaise kar luuñ ki badal gayā zamāna

ye hamārā haq hai logo ye hamārī zid nahīñ hai

jo ye gulsitāñ rahegā to rahegā āshiyāna

ye bahār kā hai mausam magar is ko kyā kaheñ ham

abhī andalīb-e-gulshan kī navā hai bāġhiyāna

mirī azmat-e-vafā se bhī vo mutma.in nahīñ haiñ

vahī jis ke jaur-e-paiham kā hai mo'tarif zamāna

mujhe tajrabāt-e-ġham ne ye adā sikhā.ī 'jauhar'

na kisī se dushmanī hai na kisī se dostāna

wahi ijz-e-bandagi hai wahi naz-e-astana

main yaqin kaise kar lun ki badal gaya zamana

ye hamara haq hai logo ye hamari zid nahin hai

jo ye gulsitan rahega to rahega aashiyana

ye bahaar ka hai mausam magar is ko kya kahen hum

abhi andalib-e-gulshan ki nawa hai baghiyana

meri azmat-e-wafa se bhi wo mutmain nahin hain

wahi jis ke jaur-e-paiham ka hai mo'tarif zamana

mujhe tajrabaat-e-gham ne ye ada sikhai 'jauhar'

na kisi se dushmani hai na kisi se dostana