wahi ek pukar wahi fughan meri mohr-e-dida-o-lab mein hai

vahī ik pukār vahī fuġhāñ mirī mohr-e-dīda-o-lab meñ hai

hai karāh jo shab-o-roz kī jo fazā ke shor-o-shaġhab meñ hai

kabhī din Dhale pe ho sāmnā kabhī diid āḳhir-e-shab meñ hai

hai yahī ma.āl-e-talab mirā tū mirī ibādat-e-rab meñ hai

kabhī fāsloñ kī masāfatoñ pe ubuur ho to ye kah sakūñ

mirā jurm hasrat-e-qurb hai to yahī kamī yahāñ sab meñ hai

sahar-e-azal ko jo dī ga.ī vahī aaj tak hai musāfirī

use tai kareñ to pata chale kahāñ kaun kis kī talab meñ hai

koī aur tarz-e-hayāt bhī mujhe ab rahīn-e-karam batā

ki hai baat merī giraftanī mirī chup bhī sū-e-adab meñ hai

wahi ek pukar wahi fughan meri mohr-e-dida-o-lab mein hai

hai karah jo shab-o-roz ki jo faza ke shor-o-shaghab mein hai

kabhi din Dhale pe ho samna kabhi did aaKHir-e-shab mein hai

hai yahi maal-e-talab mera tu meri ibaadat-e-rab mein hai

kabhi faslon ki masafaton pe ubur ho to ye kah sakun

mera jurm hasrat-e-qurb hai to yahi kami yahan sab mein hai

sahar-e-azal ko jo di gai wahi aaj tak hai musafiri

use tai karen to pata chale kahan kaun kis ki talab mein hai

koi aur tarz-e-hayat bhi mujhe ab rahin-e-karam bata

ki hai baat meri giraftani meri chup bhi su-e-adab mein hai