wahi izzat wahi zillat wahi tauqir deta hai

vahī 'izzat vahī zillat vahī tauqīr detā hai

usī se māñgiye sāhab vahī tash.hīr detā hai

shu’ūr-o-āgahī bālīdgī detā hai zehnoñ ko

zamāne meñ qalam ko quvvat-e-tahrīr detā hai

vahī ḳhāliq vahī mālik vahī qādir hai duniyā par

tamāzat shams ko jo chāñd ko tanvīr detā hai

vahī bīmār kartā hai jahān-e-zīst meñ sab ko

mu'ālij kī davāoñ meñ vahī tāsīr detā hai

bahut pahle vahī taqdīr likhtā hai ham insāñ kī

phir us ke baa'd ham ko nusḳha-e-tadbīr detā hai

wahi 'izzat wahi zillat wahi tauqir deta hai

usi se mangiye sahab wahi tashhir deta hai

shu’ur-o-agahi baalidgi deta hai zehnon ko

zamane mein qalam ko quwwat-e-tahrir deta hai

wahi KHaliq wahi malik wahi qadir hai duniya par

tamazat shams ko jo chand ko tanwir deta hai

wahi bimar karta hai jahan-e-zist mein sab ko

mu'alij ki dawaon mein wahi tasir deta hai

bahut pahle wahi taqdir likhta hai hum insan ki

phir us ke ba'd hum ko nusKHa-e-tadbir deta hai