wahi jo manzil-e-shams-o-qamar mein rahta hai

vahī jo manzil-e-shams-o-qamar meñ rahtā hai

vo husn ban ke hamārī nazar meñ rahtā hai

nazar ko apnī chhupā.e hue huuñ maiñ sab se

ki ek parda-nashīñ is nazar meñ rahtā hai

tumhārī diid kā armāñ jo ghaT gayā dil meñ

vo ban ke naala talāsh-e-asar meñ rahtā hai

asīr-e-zulf-e-parīshāñ huuñ is liye ai dost

mirā ḳhayāl hamesha safar meñ rahtā hai

qafas kī zindagī-e-be-maza ko kab hāsil

jo lutf yūrish-e-barq-o-sharar meñ rahtā hai

jidhar nigāh uThā.ūñ usī kā aks ubhre

usī kā jalva 'jamālī' nazar meñ rahtā hai

wahi jo manzil-e-shams-o-qamar mein rahta hai

wo husn ban ke hamari nazar mein rahta hai

nazar ko apni chhupae hue hun main sab se

ki ek parda-nashin is nazar mein rahta hai

tumhaari did ka arman jo ghaT gaya dil mein

wo ban ke nala talash-e-asar mein rahta hai

asir-e-zulf-e-parishan hun is liye ai dost

mera KHayal hamesha safar mein rahta hai

qafas ki zindagi-e-be-maza ko kab hasil

jo lutf yurish-e-barq-o-sharar mein rahta hai

jidhar nigah uThaun usi ka aks ubhre

usi ka jalwa 'jamali' nazar mein rahta hai