wahi jo the sang-e-mil kal tak wo jauhaDon mein paDe hue hain

vahī jo the sang-e-mīl kal tak vo jauhaḌoñ meñ paḌe hue haiñ

jo be-nishāñ the qadam qadam par nishān un ke gaḌe hue haiñ

na sirf phal balki phūl-patte bhī khā ga.e bhūke chiil kavve

kabhī jo sarsabz-o-bār-āvar the naḳhl nange khaḌe hue haiñ

gul-e-sadāqat kī un ko ḳhushbū pasand aa.ī na aa sakegī

ġhurūr-o-pindār kī ḳhudī se dimāġh un ke saḌe hue haiñ

avaam haiñ laakh Dhor Dañgar kabhī to in ko bhī ghaas Dāleñ

inhīñ haqīroñ kī azmatoñ se huzūr itne baḌe hue haiñ

muhāfizoñ kā agar chale bas to arz-e-pāk aaj bech Dāleñ

magar kareñ kyā ki ham se ġhaddār darmiyāñ meñ aḌe hue haiñ

wahi jo the sang-e-mil kal tak wo jauhaDon mein paDe hue hain

jo be-nishan the qadam qadam par nishan un ke gaDe hue hain

na sirf phal balki phul-patte bhi kha gae bhuke chil kawwe

kabhi jo sarsabz-o-bar-awar the naKHl nange khaDe hue hain

gul-e-sadaqat ki un ko KHushbu pasand aai na aa sakegi

ghurur-o-pindar ki KHudi se dimagh un ke saDe hue hain

awam hain lakh Dhor Dangar kabhi to in ko bhi ghas Dalen

inhin haqiron ki azmaton se huzur itne baDe hue hain

muhafizon ka agar chale bas to arz-e-pak aaj bech Dalen

magar karen kya ki hum se ghaddar darmiyan mein aDe hue hain