wahi KHushbu kabhi gulshan se kabhi ban se nikal

vahī ḳhushbū kabhī gulshan se kabhī ban se nikāl

vahī ātish kabhī gul se kabhī aahan se nikāl

aañkh ko vus.at-e-sahrā kā tamāshā.ī kar

nigah-e-murda-o-afsurda ko rauzan se nikāl

kar kuchh aisā ki tirī ḳhaak meñ parvāz aa.e

ab koī asp-e-falak-e-sair isī tausan se nikāl

mujh se marmar kā vo tarshā huā but kahtā thā

fan mirī raah kā patthar hai mujhe fan se nikāl

qurb-e-manzil kī bashārat hai bahut duur kī baat

rāhbar pahle hameñ panja-e-rahzan se nikāl

terī pahchān na ban jaa.e mire ḳhuun kā daaġh

ye koī phuul nahīñ hai ise dāman se nikāl

ik nigah kar ki kisī rañg pe Thahre ye hayāt

aañkh uThā aur shab-o-roz kī uljhan se nikāl

wahi KHushbu kabhi gulshan se kabhi ban se nikal

wahi aatish kabhi gul se kabhi aahan se nikal

aankh ko wusat-e-sahra ka tamashai kar

nigah-e-murda-o-afsurda ko rauzan se nikal

kar kuchh aisa ki teri KHak mein parwaz aae

ab koi asp-e-falak-e-sair isi tausan se nikal

mujh se marmar ka wo tarsha hua but kahta tha

fan meri rah ka patthar hai mujhe fan se nikal

qurb-e-manzil ki bashaarat hai bahut dur ki baat

rahbar pahle hamein panja-e-rahzan se nikal

teri pahchan na ban jae mere KHun ka dagh

ye koi phul nahin hai ise daman se nikal

ek nigah kar ki kisi rang pe Thahre ye hayat

aankh uTha aur shab-o-roz ki uljhan se nikal