wahi main hun wahi hangama-e-gham tum nahin aae

vahī maiñ huuñ vahī hangāma-e-ġham tum nahīñ aa.e

gavāhī de rahe haiñ ashk-e-shabnam tum nahīñ aa.e

hai mere vāste har aañkh pur-nam tum nahīñ aa.e

zamāna kar rahā hai merā mātam tum nahīñ aa.e

pata detī rahī hichkī tumhārī āmad-āmad kā

magar jab tak nahīñ niklā mirā dam tum nahīñ aa.e

shab-e-furqat tulū'-e-sub.h ke lamhe bhī aa pahuñche

sitāroñ kī chamak bhī ho ga.ī kam tum nahīñ aa.e

'amīr'-e-dehlavī ne jaan de dī hijr ke maare

magar ai mere mūnis mere hamdam tum nahīñ aa.e

wahi main hun wahi hangama-e-gham tum nahin aae

gawahi de rahe hain ashk-e-shabnam tum nahin aae

hai mere waste har aankh pur-nam tum nahin aae

zamana kar raha hai mera matam tum nahin aae

pata deti rahi hichki tumhaari aamad-amad ka

magar jab tak nahin nikla mera dam tum nahin aae

shab-e-furqat tulu'-e-subh ke lamhe bhi aa pahunche

sitaron ki chamak bhi ho gai kam tum nahin aae

'amir'-e-dehlawi ne jaan de di hijr ke mare

magar ai mere munis mere hamdam tum nahin aae