wahi manazir wahi musafir wahi sada ka jada tha

vahī manāzir vahī musāfir vahī sadā kā jaada thā

jab uftād paḌī thī mujh se maiñ hī duur uftāda thā

ek ummīd-o-bīm ke aalam meñ bastī dam sādhe thī

aur havā ke tevar the paanī kā aur irāda thā

sūraj bhī pahne the maiñ ne aur taare bhī oḌhe the

din meñ aur mirā pairāhan shab meñ aur labāda thā

us ne mujh ko dariyā kar Daalā ye us kī azmat hai

maiñ to qatre kī sūrat bhī rahne par āmāda thā

gaThḌī sar se kyā utrī maiñ apnī chaal hī bhuul gayā

tan kar chaltā thā maiñ jab tak sar par bojh ziyāda thā

par ik roz mirā beTā merī masnad par aa baiThā

jab tak merī maañ zinda thī maiñ ghar meñ shahzāda thā

ab 'saifī' kī bātoñ meñ vo pahle jaisī baat kahāñ

shahr meñ aane se pahle ye shaḳhs nihāyat saada thā

wahi manazir wahi musafir wahi sada ka jada tha

jab uftad paDi thi mujh se main hi dur uftada tha

ek ummid-o-bim ke aalam mein basti dam sadhe thi

aur hawa ke tewar the pani ka aur irada tha

suraj bhi pahne the main ne aur tare bhi oDhe the

din mein aur mera pairahan shab mein aur labaada tha

us ne mujh ko dariya kar Dala ye us ki azmat hai

main to qatre ki surat bhi rahne par aamada tha

gaThDi sar se kya utri main apni chaal hi bhul gaya

tan kar chalta tha main jab tak sar par bojh ziyaada tha

par ek roz mera beTa meri masnad par aa baiTha

jab tak meri man zinda thi main ghar mein shahzada tha

ab 'saifi' ki baaton mein wo pahle jaisi baat kahan

shahr mein aane se pahle ye shaKHs nihayat sada tha