wahi meri na-muradi wahi gardish-e-zamana

vahī merī nā-murādī vahī gardish-e-zamāna

mirī zindagī tasavvur mirī ishrateñ fasāna

na huzūriyoñ kī ḳhvāhish na visāl kī tamanna

mujhe ab bhī hai ta.āruf vahī un se ġhā.ebāna

jo tujhe ḳhayāl hotā ye mirā na haal hotā

na tirī nigāh badlī na badal sakā zamāna

ye jahāñ kī ek karvaT ye ḳhizāñ kā ek dhokā

ye havā.eñ bhīgī bhīgī ye bahār kā tarāna

koī ḳhvāb thā ye shāyad jo nazar meñ phir rahā hai

vo mirī niyāz-mandī vo kisī kā āstāna

na tirā surāġh paayā na sukūñ kā raaz paayā

mirī zindagī thī goyā ġham-e-dil kā ik bahāna

mirī ārzū-e-rusvā na chhupegī 'hosh' mujh se

ki mirī nigāh meñ hai mire dard kā fasāna

wahi meri na-muradi wahi gardish-e-zamana

meri zindagi tasawwur meri ishraten fasana

na huzuriyon ki KHwahish na visal ki tamanna

mujhe ab bhi hai taaruf wahi un se ghaebana

jo tujhe KHayal hota ye mera na haal hota

na teri nigah badli na badal saka zamana

ye jahan ki ek karwaT ye KHizan ka ek dhoka

ye hawaen bhigi bhigi ye bahaar ka tarana

koi KHwab tha ye shayad jo nazar mein phir raha hai

wo meri niyaz-mandi wo kisi ka aastana

na tera suragh paya na sukun ka raaz paya

meri zindagi thi goya gham-e-dil ka ek bahana

meri aarzu-e-ruswa na chhupegi 'hosh' mujh se

ki meri nigah mein hai mere dard ka fasana