wahi raat bhar tujhe sochna wahi chahaton ke nisab hain

vahī raat bhar tujhe sochnā vahī chāhatoñ ke nisāb haiñ

ye baḌe tavīl haiñ silsile ye baḌe tavīl azaab haiñ

hameñ roz miltī haiñ sāzisheñ yahāñ dostī ke libās meñ

yahāñ har qadam pe fareb haiñ yahāñ har qadam pe sarāb haiñ

ye karam hai rabb-e-karīm kā mujhe itne rang atā kiye

jo miTā rahe the nishāñ mirā na savāl haiñ na javāb haiñ

jo samundaroñ meñ sukūt hai use dekh kar na fareb khā

ka.ī ashk haiñ jo bahe nahīñ ka.ī zalzale tah-e-āb haiñ

ka.ī chāñdnī meñ guñdhe hue ka.ī titliyoñ meñ ghire hue

vo jo phuul the tirī raah ke vahī aaj mujh pe azaab haiñ

vo jo log the yahāñ ret se unheñ kyā huā vo kahāñ ga.e

yahāñ pattharoñ sī hai be-hisī yahāñ pattharoñ se gulāb haiñ

hameñ bhuuk apnī qubūl hai yahāñ nafrateñ nahīñ bechnā

mire gaañv meñ baḌā amn hai mirī aañkh meñ baḌe ḳhvāb haiñ

wahi raat bhar tujhe sochna wahi chahaton ke nisab hain

ye baDe tawil hain silsile ye baDe tawil azab hain

hamein roz milti hain sazishen yahan dosti ke libas mein

yahan har qadam pe fareb hain yahan har qadam pe sarab hain

ye karam hai rabb-e-karim ka mujhe itne rang ata kiye

jo miTa rahe the nishan mera na sawal hain na jawab hain

jo samundaron mein sukut hai use dekh kar na fareb kha

kai ashk hain jo bahe nahin kai zalzale tah-e-ab hain

kai chandni mein gundhe hue kai titliyon mein ghire hue

wo jo phul the teri rah ke wahi aaj mujh pe azab hain

wo jo log the yahan ret se unhen kya hua wo kahan gae

yahan pattharon si hai be-hisi yahan pattharon se gulab hain

hamein bhuk apni qubul hai yahan nafraten nahin bechna

mere ganw mein baDa amn hai meri aankh mein baDe KHwab hain