wahi raaten aaen wahi zariyan

vahī rāteñ aa.eñ vahī zāriyāñ

vahī phir sahar tak kī bedāriyāñ

parī huur insāñ kisī meñ nahīñ

jo dekhī haiñ tujh meñ adā-dāriyāñ

maiñ kāfir huuñ par dekh saktā nahīñ

kamar se tirī rabt-e-zunnāriyāñ

na the daaġh siine ke itne ghane

ye haiñ dast-e-qudrat kī gul-kāriyāñ

ham ik roz jī se guzar jā.eñge

raheñ yuuñ hī gar nit kī be-zāriyāñ

bahāreñ kahāñ abr-e-gulnār kī

kahāñ merī mizhgāñ kī ḳhūñ-bāriyāñ

na sajdoñ se hāsil huā vasl-e-yār

maiñ ka.abe meñ bhī Takkareñ māriyāñ

mavāqīs jis dam to sābit huiiñ

sivā ishq ke kitnī bīmāriyāñ

tū kaisī balā meñ phañsā 'mus.hafī'

huiiñ kyā divāne vo hoshyāriyāñ

wahi raaten aaen wahi zariyan

wahi phir sahar tak ki bedariyan

pari hur insan kisi mein nahin

jo dekhi hain tujh mein ada-dariyan

main kafir hun par dekh sakta nahin

kamar se teri rabt-e-zunnariyan

na the dagh sine ke itne ghane

ye hain dast-e-qudrat ki gul-kariyan

hum ek roz ji se guzar jaenge

rahen yun hi gar nit ki be-zariyan

bahaaren kahan abr-e-gulnar ki

kahan meri mizhgan ki KHun-bariyan

na sajdon se hasil hua wasl-e-yar

main kabe mein bhi Takkaren mariyan

mawaqis jis dam to sabit huin

siwa ishq ke kitni bimariyan

tu kaisi bala mein phansa 'mushafi'

huin kya diwane wo hoshyariyan