wahi sahra sa bahut aur zara sa dariya

vahī sahrā sā bahut aur zarā sā dariyā

mujh ko lagtā hai tirā naam sunā sā dariyā

sab pahuñchte haiñ faqat pyaas bujhāne apnī

koī dekhe bhī to kaise ki hai pyāsā dariyā

terī āñkheñ haiñ samundar ye batāyā jab se

tab se aatā hai nazar mujh se ḳhafā sā dariyā

tishna-kāmoñ kī baḌī bhiiḌ lagī hai dekho

jo bhī aa.e use detā hai dilāsā dariyā

ḳhushk lab apne bhalā us ko dikhātā kaise

nazar aayā thā liye haath meñ kaasa dariyā

tairte tairte maiñ aaj bhī tāza-dam huuñ

bahte bahte nazar aatā hai thakā sā dariyā

mere lab par hai vahī pyaas purānī ab tak

mere aage hai ravāñ ek nayā sā dariyā

bolo kyā loge idhar chhoTā samundar hai 'kamāl'

hai udhar rakkhā huā ek baḌā sā dariyā

wahi sahra sa bahut aur zara sa dariya

mujh ko lagta hai tera nam suna sa dariya

sab pahunchte hain faqat pyas bujhane apni

koi dekhe bhi to kaise ki hai pyasa dariya

teri aankhen hain samundar ye bataya jab se

tab se aata hai nazar mujh se KHafa sa dariya

tishna-kaamon ki baDi bhiD lagi hai dekho

jo bhi aae use deta hai dilasa dariya

KHushk lab apne bhala us ko dikhata kaise

nazar aaya tha liye hath mein kasa dariya

tairte tairte main aaj bhi taza-dam hun

bahte bahte nazar aata hai thaka sa dariya

mere lab par hai wahi pyas purani ab tak

mere aage hai rawan ek naya sa dariya

bolo kya loge idhar chhoTa samundar hai 'kamal'

hai udhar rakkha hua ek baDa sa dariya