wahi sar hai wahi sauda wahi wahshat hai miyan

vahī sar hai vahī saudā vahī vahshat hai miyāñ

ab bhī aa jaao ki dil kī vahī ḳhalvat hai miyāñ

vus.at-e-dīd simaTne hī nahīñ paatī hai

chashm-e-āhū se hameñ aaj bhī nisbat hai miyāñ

umr jab hijr-e-musalsal kī masāfat meñ kaTī

ye bhī kaT jā.egī ik din shab-e-furqat hai miyāñ

kū-e-dildār meñ baaqī nahīñ shorīda-sarāñ

shahr daryūza-gar-e-kūcha-e-shohrat hai miyāñ

kyuuñ na ham mauja-e-hairat se lipaT kar soveñ

vasl ab tere liye bhī to mashaqqat hai miyāñ

tum ne kyā dekhe nahīñ shams-o-qamar nezoñ par

jashn-e-zulmāt pe ab kaun sī hairat hai miyāñ

farq-e-tābāñ hai tirā matl.a-e-ḳhurshīd magar

tere kākul meñ chhupī shām-e-qayāmat hai miyāñ

dasht-e-hastī meñ bahut ābla-pā.ī hai 'nadīm'

sarhad-e-marg-e-musalsal to aziyyat hai miyāñ

wahi sar hai wahi sauda wahi wahshat hai miyan

ab bhi aa jao ki dil ki wahi KHalwat hai miyan

wusat-e-did simaTne hi nahin pati hai

chashm-e-ahu se hamein aaj bhi nisbat hai miyan

umr jab hijr-e-musalsal ki masafat mein kaTi

ye bhi kaT jaegi ek din shab-e-furqat hai miyan

ku-e-dildar mein baqi nahin shorida-saran

shahr daryuza-gar-e-kucha-e-shohrat hai miyan

kyun na hum mauja-e-hairat se lipaT kar sowen

wasl ab tere liye bhi to mashaqqat hai miyan

tum ne kya dekhe nahin shams-o-qamar nezon par

jashn-e-zulmat pe ab kaun si hairat hai miyan

farq-e-taban hai tera matla-e-KHurshid magar

tere kakul mein chhupi sham-e-qayamat hai miyan

dasht-e-hasti mein bahut aabla-pai hai 'nadim'

sarhad-e-marg-e-musalsal to aziyyat hai miyan