wahi sham ke dilase wahi subh ke bahane

vahī shaam ke dilāse vahī sub.h ke bahāne

shab-e-tār se farāġhat mile kab ḳhudā hī jaane

kahāñ vo ḳhafā ḳhafā the kahāñ aa ga.e manāne

mirī jiit ban ga.e haiñ mirī haar ke zamāne

nahīñ fasl-e-gul kā shaidā mirī ḳhvāhishoñ kā mausam

gul-e-dil karūñ jo arpan mirā devtā na jaane

shab-e-ġham badal ga.ī hai ruḳh-e-kahkashāñ kī sūrat

tirī yaad se haiñ raushan mire ġham ke ḳhāne-ḳhāne

tirī zulf-e-ambarīñ to vo matā.a-e-dilkashī hai

jise raat ne churā lī jise maañg lī ghaTā ne

tujhe pā ke bhī na paanā tujhe kho ke phir machalnā

yahī uljhanoñ ke phere yahī jiine ke bahāne

jo sitam hai un kī fitrat to hai sabr apnī aadat

diyā jor-o-zulm un ko hameñ hausla ḳhudā ne

tirī aañkh ke ye sāġhar lab-e-nāz ke kaTore

mire naam aaj kar de ye sabhī sharāb-ḳhāne

mire dil meñ ai 'fahīm' ab uThe haiñ jo dard-e-paiham

mujhe yaad aa rahe haiñ vo shabāb ke zamāne

wahi sham ke dilase wahi subh ke bahane

shab-e-tar se faraghat mile kab KHuda hi jaane

kahan wo KHafa KHafa the kahan aa gae manane

meri jit ban gae hain meri haar ke zamane

nahin fasl-e-gul ka shaida meri KHwahishon ka mausam

gul-e-dil karun jo arpan mera dewta na jaane

shab-e-gham badal gai hai ruKH-e-kahkashan ki surat

teri yaad se hain raushan mere gham ke KHane-KHane

teri zulf-e-ambarin to wo mataa-e-dilkashi hai

jise raat ne chura li jise mang li ghaTa ne

tujhe pa ke bhi na pana tujhe kho ke phir machalna

yahi uljhanon ke phere yahi jine ke bahane

jo sitam hai un ki fitrat to hai sabr apni aadat

diya jor-o-zulm un ko hamein hausla KHuda ne

teri aankh ke ye saghar lab-e-naz ke kaTore

mere nam aaj kar de ye sabhi sharab-KHane

mere dil mein ai 'fahim' ab uThe hain jo dard-e-paiham

mujhe yaad aa rahe hain wo shabab ke zamane