wahin par hun jahan rukta raha hun

vahīñ par huuñ jahāñ ruktā rahā huuñ

maiñ apne aap se uktā rahā huuñ

guzartī umr ke hamrāh ḳhud par

sahīfoñ kī tarah khultā rahā huuñ

suno merī bhī kuchh ab to ḳhudārā

tumhārī bhī to maiñ suntā rahā huuñ

jo kiiñ haiñ pesh tum ne kyā batā.ūñ

har ik mantiq pe sar dhuntā rahā huuñ

bachāne ḳhud ko apnī hī tapish se

maiñ apne saa.e meñ chhuptā rahā huuñ

bahut DhūñDā hai maiñ ne ḳhud ko lekin

isī koshish meñ ḳhud gumtā rahā huuñ

chale aate haiñ rozāna Darāne

vo jin ke qarz meñ chuktā rahā huuñ

parā.e shahr meñ yāroñ se kaT kar

ġharīboñ kī tarah rultā rahā huuñ

ye qīmat kam hai shāyad maiñ tumhāre

tarāzū meñ ġhalat tultā rahā huuñ

nahīñ aadat mujhe piine kī maiñ to

tumhārī yaad meñ ghultā rahā huuñ

chale aao ki rasta saaf hai ab

maiñ kāñTe raah ke chuntā rahā huuñ

wahin par hun jahan rukta raha hun

main apne aap se ukta raha hun

guzarti umr ke hamrah KHud par

sahifon ki tarah khulta raha hun

suno meri bhi kuchh ab to KHudara

tumhaari bhi to main sunta raha hun

jo kin hain pesh tum ne kya bataun

har ek mantiq pe sar dhunta raha hun

bachane KHud ko apni hi tapish se

main apne sae mein chhupta raha hun

bahut DhunDa hai main ne KHud ko lekin

isi koshish mein KHud gumta raha hun

chale aate hain rozana Darane

wo jin ke qarz mein chukta raha hun

parae shahr mein yaron se kaT kar

gharibon ki tarah rulta raha hun

ye qimat kam hai shayad main tumhaare

taraazu mein ghalat tulta raha hun

nahin aadat mujhe pine ki main to

tumhaari yaad mein ghulta raha hun

chale aao ki rasta saf hai ab

main kanTe rah ke chunta raha hun