wahshat-e-dil mangti hai dasht ka manzar koi

vahshat-e-dil māñgtī hai dasht kā manzar koī

kar fasīl-e-shahr meñ āvārgī ab dar koī

āgahī ham par musībat gumrahī ham par harām

de suhūlat zindagī ko dāvar-e-mahshar koī

yā to chashm-e-bad lagī hai ghar kī is dīvār ko

yā kahīñ buniyād meñ kam paḌ gayā patthar koī

ḳhud banānā paḌ rahā hai paikar-e-shakl-e-vajūd

ham se patthar ko mayassar hai kahāñ aazar koī

tab talak hāsil shu’ūr-e-zindagī hotā nahīñ

jab talak lagtī nahīñ insān ko Thokar koī

ik nazar duniyā kī jānib ik nazar us kī taraf

hai hamārī zaat ke andar koī bāhar koī

hai ye parvāz-e-taḳhayyul yā hai iz.hār-e-vajūd

yā ki phir ilhām hai ye shā'irī ham par koī

wahshat-e-dil mangti hai dasht ka manzar koi

kar fasil-e-shahr mein aawargi ab dar koi

aagahi hum par musibat gumrahi hum par haram

de suhulat zindagi ko dawar-e-mahshar koi

ya to chashm-e-bad lagi hai ghar ki is diwar ko

ya kahin buniyaad mein kam paD gaya patthar koi

KHud banana paD raha hai paikar-e-shakl-e-wajud

hum se patthar ko mayassar hai kahan aazar koi

tab talak hasil shu’ur-e-zindagi hota nahin

jab talak lagti nahin insan ko Thokar koi

ek nazar duniya ki jaanib ek nazar us ki taraf

hai hamari zat ke andar koi bahar koi

hai ye parwaz-e-taKHayyul ya hai izhaar-e-wajud

ya ki phir ilham hai ye sha'iri hum par koi