wahshat-e-gham mein sukun zist ko milta bhi kahan

vahshat-e-ġham meñ sukūñ ziist ko miltā bhī kahāñ

thā bayābān meñ dīvār kā saayā bhī kahāñ

ek muddat se na yaad aa.ī na jaañ taḌpī hai

dil tujhe bhuul gayā ho magar aisā bhī kahāñ

husn bhī vo na rahā pahlā sā dildār-e-hunar

aah pahlī sī vo ab azmat-e-tesha bhī kahāñ

maslahat-bīñ hai agar ishq-e-junūñ-pesha to kyā

ab vo pahle kī tirā vus.at-e-sahrā bhī kahāñ

koī manzil hī na thī manzil-e-ġham se aage

qāfila apnī tamannāoñ kā ruktā bhī kahāñ

ġhair-mahdūd ḳhalāoñ meñ safar kartā huuñ

aur rasā.ī kā ye aalam hai ki bhaTkā bhī kahāñ

nikhat-o-nūr se ma.amūr fazā hai phir bhī

to ki is rāhguzar se abhī guzrā bhī kahāñ

haram-o-dair se ye sar jo kashīda aayā

jhuk gayā dar pe tire aur ye jhuktā bhī kahāñ

ḳhaak uḌātā hai abhī dasht-e-talab hī meñ 'salām'

dil-e-rusvā ye huā hai abhī rusvā bhī kahāñ

wahshat-e-gham mein sukun zist ko milta bhi kahan

tha bayaban mein diwar ka saya bhi kahan

ek muddat se na yaad aai na jaan taDpi hai

dil tujhe bhul gaya ho magar aisa bhi kahan

husn bhi wo na raha pahla sa dildar-e-hunar

aah pahli si wo ab azmat-e-tesha bhi kahan

maslahat-bin hai agar ishq-e-junun-pesha to kya

ab wo pahle ki tera wusat-e-sahra bhi kahan

koi manzil hi na thi manzil-e-gham se aage

qafila apni tamannaon ka rukta bhi kahan

ghair-mahdud KHalaon mein safar karta hun

aur rasai ka ye aalam hai ki bhaTka bhi kahan

nikhat-o-nur se mamur faza hai phir bhi

to ki is rahguzar se abhi guzra bhi kahan

haram-o-dair se ye sar jo kashida aaya

jhuk gaya dar pe tere aur ye jhukta bhi kahan

KHak uData hai abhi dasht-e-talab hi mein 'salam'

dil-e-ruswa ye hua hai abhi ruswa bhi kahan