wahshat-e-hijr hai andesha-e-tanhai hai

vahshat-e-hijr hai andesha-e-tanhā.ī hai

bāb-e-hastī kā 'ajab qissa-e-tanhā.ī hai

jis taraf dekhtā huuñ sāya-e-tanhā.ī hai

āḳhirash tā-ba-kujā hītā-e-tanhā.ī hai

vo ki jis qabr pe mela sā lagā rahtā thā

aaj ḳhasta sā vahāñ katba-e-tanhā.ī hai

phir se ik baar vahī jurm kiyā hai maiñ ne

phir se ik baar mujhe ḳhadsha-e-tanhā.ī hai

maiñ to bas mā'nā-e-misdāq usī lafz kā huuñ

mus.haf-e-zīst meñ jo sīġha-e-tanhā.ī hai

‘ālam-e-vasl kī lazzat se maiñ vāqif hī kahāñ

mere hisse meñ to bas gosha-e-tanhā.ī hai

āj-kal niiñd se is tarh maiñ chauñk uThtā huuñ

jaise ḳhvāboñ pe bhī ab qabza-e-tanhā.ī hai

'ishq kā ek jazīra hai mirā dil 'sāqib'

aur phir is meñ faqat mauja-e-tanhā.ī hai

wahshat-e-hijr hai andesha-e-tanhai hai

bab-e-hasti ka 'ajab qissa-e-tanhai hai

jis taraf dekhta hun saya-e-tanhai hai

aaKHirash ta-ba-kuja hita-e-tanhai hai

wo ki jis qabr pe mela sa laga rahta tha

aaj KHasta sa wahan katba-e-tanhai hai

phir se ek bar wahi jurm kiya hai main ne

phir se ek bar mujhe KHadsha-e-tanhai hai

main to bas ma'na-e-misdaq usi lafz ka hun

mushaf-e-zist mein jo sigha-e-tanhai hai

‘alam-e-wasl ki lazzat se main waqif hi kahan

mere hisse mein to bas gosha-e-tanhai hai

aaj-kal nind se is tarh main chaunk uThta hun

jaise KHwabon pe bhi ab qabza-e-tanhai hai

'ishq ka ek jazira hai mera dil 'saqib'

aur phir is mein faqat mauja-e-tanhai hai