wahshat-e-jaan ka silsila bola

vahshat-e-jāñ kā silsila bolā

chup rahī maiñ to aa.ina bolā

log pal bhar meñ bhuul jaate haiñ

ek manzil se rāsta bolā

hashr ke din mirī shafā'at ko

un kī nisbat kā vāsta bolā

lafz jab be-zabān hone lage

dil se phir dil kā rābta bolā

maiñ ne urdu meñ baat kī jab bhī

sab zabānoñ kā zā.iqa bolā

manzileñ paas aa ga.iiñ chal kar

jab musāfir kā hausla bolā

ham ko gumrāh kar gayā rahbar

biich raste meñ qāfila bolā

dil se jaatī nahīñ hai yaad tirī

saiñkaḌoñ baar taḳhliya bolā

vo kisī roz chhoḌ jā.egā

bār-hā dil se vasvasa bolā

sab radīfoñ ko maat dī 'ambar'

aisā bharpūr qāfiya bolā

wahshat-e-jaan ka silsila bola

chup rahi main to aaina bola

log pal bhar mein bhul jate hain

ek manzil se rasta bola

hashr ke din meri shafa'at ko

un ki nisbat ka wasta bola

lafz jab be-zaban hone lage

dil se phir dil ka rabta bola

main ne urdu mein baat ki jab bhi

sab zabanon ka zaiqa bola

manzilen pas aa gain chal kar

jab musafir ka hausla bola

hum ko gumrah kar gaya rahbar

bich raste mein qafila bola

dil se jati nahin hai yaad teri

sainkaDon bar taKHliya bola

wo kisi roz chhoD jaega

bar-ha dil se waswasa bola

sab radifon ko mat di 'ambar'

aisa bharpur qafiya bola