wahshat ki mari aankhon ne dil ke shahr ko pur-KHun dekha

vahshat kī maarī āñkhoñ ne dil ke shahr ko pur-ḳhūñ dekhā

shīsha-e-ḳhvāb se yuuñ pathrā.īñ ki der talak phir gardūñ dekhā

ghun ke gharoñ ke gun gaao ham un kī hifāzat meñ piste haiñ

kiiḌo makoḌo tumhārī majāl ki tum ne hamārā gehūñ dekhā

jis kaayā chhattar-chhāyā ne dhūpoñ ke dhāre ġhalat kiye

hañste baste pāgal ne us bādal se bāhar kyoñ dekhā

chandra-mukhī sub.hoñ ko taḌpī shāmoñ ko sūraj-mukhī roī

roz-o-shab ke ā.īne ko ham ne hamesha digar-gūñ dekhā

sakhiyoñ allah-rakhiyoñ ne bas tā'bīroñ kī dhuul uḌaa.ī

maiñ ne puure hosh-o-havās meñ dhund ke paar humāyūñ dekhā

kaisī rasīlī kaisī kaTīlī ok pe apnī pyāsī nazar thī

juuñ ganne kī poreñ dekhīñ aur poroñ meñ līmūñ dekhā

shā'ir ne dīvār-e-'adam se rauzan-e-bandobast nikālā

mahbūba ke iiñT barābar nazzāre ko juuñ tuuñ dekhā

wahshat ki mari aankhon ne dil ke shahr ko pur-KHun dekha

shisha-e-KHwab se yun pathrain ki der talak phir gardun dekha

ghun ke gharon ke gun gao hum un ki hifazat mein piste hain

kiDo makoDo tumhaari majal ki tum ne hamara gehun dekha

jis kaya chhattar-chhaya ne dhupon ke dhaare ghalat kiye

hanste baste pagal ne us baadal se bahar kyon dekha

chandra-mukhi subhon ko taDpi shamon ko suraj-mukhi roi

roz-o-shab ke aaine ko hum ne hamesha digar-gun dekha

sakhiyon allah-rakhiyon ne bas ta'biron ki dhul uDai

main ne pure hosh-o-hawas mein dhund ke par humayun dekha

kaisi rasili kaisi kaTili ok pe apni pyasi nazar thi

jun ganne ki poren dekhin aur poron mein limun dekha

sha'ir ne diwar-e-'adam se rauzan-e-bandobast nikala

mahbuba ke inT barabar nazzare ko jun tun dekha