wahshat nahin hoti koi sauda nahin hota

vahshat nahīñ hotī koī saudā nahīñ hotā

ai kaash ki maiñ ne tujhe dekhā nahīñ hotā

hone ko to is duniyā meñ kyā kyā nahīñ hotā

ik tū hī kisī taur hamārā nahīñ hotā

kyā baat hai kāfūr nahīñ hotī siyāhī

kyoñ sham' nahīñ jaltī ujālā nahīñ hotā

ye dard hai kyā dard ki thamtā hī nahīñ hai

ye zaḳhm hai kyā zaḳhm ki achchhā nahīñ hotā

ye raat hai kyā raat ki kaTtī hī nahīñ hai

kyā baat hai kyoñ nuur kā taḌkā nahīñ hotā

rakhte ho sab andāz ravā dushmanī vaale

ye kyā hai mohabbat meñ to aisā nahīñ hotā

do pal jo Thahar jaao to baḌh jaatā hai aage

ye vaqt hai aur vaqt kisī kā nahīñ hotā

hote haiñ mire saath mire saare masā.il

maiñ ho ke akelā bhī akelā nahīñ hotā

'nūr' aaj ke kāmoñ ko uThā rakkho na kal par

kyā kal kā bharosa hai ki hotā nahīñ hotā

wahshat nahin hoti koi sauda nahin hota

ai kash ki main ne tujhe dekha nahin hota

hone ko to is duniya mein kya kya nahin hota

ek tu hi kisi taur hamara nahin hota

kya baat hai kafur nahin hoti siyahi

kyon sham' nahin jalti ujala nahin hota

ye dard hai kya dard ki thamta hi nahin hai

ye zaKHm hai kya zaKHm ki achchha nahin hota

ye raat hai kya raat ki kaTti hi nahin hai

kya baat hai kyon nur ka taDka nahin hota

rakhte ho sab andaz rawa dushmani wale

ye kya hai mohabbat mein to aisa nahin hota

do pal jo Thahar jao to baDh jata hai aage

ye waqt hai aur waqt kisi ka nahin hota

hote hain mere sath mere sare masail

main ho ke akela bhi akela nahin hota

'nur' aaj ke kaamon ko uTha rakkho na kal par

kya kal ka bharosa hai ki hota nahin hota