wahshaton ka sar-o-saman hamein hona hai

vahshatoñ kā sar-o-sāmān hameñ honā hai

mustaqbil dasht-o-bayābān hameñ honā hai

ham to dillī bhī nahīñ haiñ ki ka.ī baar luTeñ

ek hī baar meñ vīrān hameñ honā hai

ham ko ab nām-o-nasab se na pukāre koī

ik na.e daur kī pahchān hameñ honā hai

is liye ham se hī mansūb hai ye karb-o-balā

ai zamīñ terā nigahbān hameñ honā hai

chehra paḌhte hī koī dil kī kahānī paḌh le

zindagī itnā kab āsān hameñ honā hai

wahshaton ka sar-o-saman hamein hona hai

mustaqbil dasht-o-bayaban hamein hona hai

hum to dilli bhi nahin hain ki kai bar luTen

ek hi bar mein viran hamein hona hai

hum ko ab nam-o-nasab se na pukare koi

ek nae daur ki pahchan hamein hona hai

is liye hum se hi mansub hai ye karb-o-bala

ai zamin tera nigahban hamein hona hai

chehra paDhte hi koi dil ki kahani paDh le

zindagi itna kab aasan hamein hona hai