wahshaton mein ishq ki wo shana farmaenge kya

vahshatoñ meñ ishq kī vo shāna farmā.eñge kyā

zindagī uljhī huī hai baal suljhā.eñge kyā

ḳhud hī tum socho jo duniyā meñ asīr-e-zāt haiñ

vo dukhoñ kī bhiiḌ meñ ārām pahuñchā.eñge kyā

daur-e-istibdād meñ ai dil fuġhāñ be-sūd hai

garmī-e-fariyād se patthar pighal jā.eñge kyā

sone chāñdnī kī ye nahreñ ye falak-paimā mahal

baad marne ke tire mahshar meñ kaam ā.eñge kyā

ham ne sadiyoñ kā chaman chhoḌā vafā kī aas par

ab tumhāre des meñ bhī Thokareñ khā.eñge kyā

tāqat-e-zabt-o-tahammul kab kī ruḳhsat ho chukī

nā-tavān-e-ishq ko vo aur taḌpā.eñge kyā

ai shuā-e-mehr-e-tābāñ jalva-rezī se tirī

sañg-reze raah ke almās ban jā.eñge kyā

jo musalsal asr-e-nau se barsar-e-paikār haiñ

vo bhī thak kar vaqt ke sāñche meñ Dhal jā.eñge kyā

wahshaton mein ishq ki wo shana farmaenge kya

zindagi uljhi hui hai baal suljhaenge kya

KHud hi tum socho jo duniya mein asir-e-zat hain

wo dukhon ki bhiD mein aaram pahunchaenge kya

daur-e-istibdad mein ai dil fughan be-sud hai

garmi-e-fariyaad se patthar pighal jaenge kya

sone chandni ki ye nahren ye falak-paima mahal

baad marne ke tere mahshar mein kaam aaenge kya

hum ne sadiyon ka chaman chhoDa wafa ki aas par

ab tumhaare des mein bhi Thokaren khaenge kya

taqat-e-zabt-o-tahammul kab ki ruKHsat ho chuki

na-tawan-e-ishq ko wo aur taDpaenge kya

ai shua-e-mehr-e-taban jalwa-rezi se teri

sang-reze rah ke almas ban jaenge kya

jo musalsal asr-e-nau se barsar-e-paikar hain

wo bhi thak kar waqt ke sanche mein Dhal jaenge kya