wahshi tera tarz-e-junun mein sab se raha begana bhi

vahshī terā tarz-e-jūn.un meñ sab se rahā begāna bhī

qais se go ulfat bhī rahī farhād se thā yārāna bhī

zulfeñ terī jān-e-do-ālam uf rī shamīm-e-rūh-afzā

dil to bhalā bīmār hī thā achchhā hai ik dīvāna bhī

terā muñh aur mai kī hurmat dekh na sun le rind koī

vaa.iz ye andāz-e-bayāñ hai saḳht bhī gustāḳhāna bhī

shahr meñ tere jān-e-jahāñ barbād ho kab tak ḳhāna-e-dil

kaash ho tere qadmoñ se ābād mirā vīrāna bhī

shauq-e-ziyārat kūche meñ us shoḳh ke mujh ko laayā hai

TuuTā phūTā dil hai merā pahlū meñ nazrāna bhī

mai-ḳhāne meñ dekho rind-o-shaiḳh na aane paa.e kabhī

pīr-e-muġhāñ se chashmak bhī hai aql se hai begāna bhī

maanā maiñ ne chashm-e-karam din raat adū par rahtī hai

brij raushan ruḳh se tere hogā merā kāshāna bhī

aariz tere sham.a safā haiñ rāhbar-e-kul-ahl-e-vafā haiñ

pahūñchā apne maqsad tak is raushnī meñ parvāna bhī

aarā sar par kyoñ na chale hairāñ na kyoñ ho dil apnā

zaanū par hai aa.ina un ke zulf-e-siyah meñ shāna bhī

chashm-e-sāqī rah rah kar āñkhoñ se mirī laḌtī hī rahī

jaam pe jaam aate hī rahe paimāne par paimāna bhī

zulf se uljhā vahshī thā qadmoñ pe miTā mansūr huā

āshiq terā jān-e-jahāñ hushiyār bhī hai dīvāna bhī

aa.ī shab-e-ġham maut jo merī dard-e-jigar kī shiddat meñ

qissa merā sun ke kahā pur-dard hai ye afsāna bhī

vāpas aaya jā ke shabāb ik huur jo apnā mehmāñ hai

rashk-e-jannat nām-e-ḳhudā hai aaj mirā kāshāna bhī

wahshi tera tarz-e-junun mein sab se raha begana bhi

qais se go ulfat bhi rahi farhad se tha yarana bhi

zulfen teri jaan-e-do-alam uf ri shamim-e-ruh-afza

dil to bhala bimar hi tha achchha hai ek diwana bhi

tera munh aur mai ki hurmat dekh na sun le rind koi

waiz ye andaz-e-bayan hai saKHt bhi gustaKHana bhi

shahr mein tere jaan-e-jahan barbaad ho kab tak KHana-e-dil

kash ho tere qadmon se aabaad mera virana bhi

shauq-e-ziyarat kuche mein us shoKH ke mujh ko laya hai

TuTa phuTa dil hai mera pahlu mein nazrana bhi

mai-KHane mein dekho rind-o-shaiKH na aane pae kabhi

pir-e-mughan se chashmak bhi hai aql se hai begana bhi

mana main ne chashm-e-karam din raat adu par rahti hai

brij raushan ruKH se tere hoga mera kashana bhi

aariz tere shama safa hain rahbar-e-kul-ahl-e-wafa hain

pahuncha apne maqsad tak is raushni mein parwana bhi

aara sar par kyon na chale hairan na kyon ho dil apna

zanu par hai aaina un ke zulf-e-siyah mein shana bhi

chashm-e-saqi rah rah kar aankhon se meri laDti hi rahi

jam pe jam aate hi rahe paimane par paimana bhi

zulf se uljha wahshi tha qadmon pe miTa mansur hua

aashiq tera jaan-e-jahan hushiyar bhi hai diwana bhi

aai shab-e-gham maut jo meri dard-e-jigar ki shiddat mein

qissa mera sun ke kaha pur-dard hai ye afsana bhi

wapas aaya ja ke shabab ek hur jo apna mehman hai

rashk-e-jannat nam-e-KHuda hai aaj mera kashana bhi