waise hamara duniya se lena na dena hai

vaise hamārā duniyā se lenā na denā hai

phir bhī jo māñgtī hai faqīrāna denā hai

ulTe savāl kartī rahe ham se ye hayāt

ham ne javāb to koī sīdhā na denā hai

aglī dukān-e-ishq kā khātā nahīñ khulā

pichhlī kā koī ham ko baqāyā na denā hai

ham apnā tāj-o-taḳht uThā.eñge soch kar

miTTī ko jo bhī denā hai shāhāna denā hai

kahiyo kabhī akele meñ vo nāma-bar mile

gaalī na denī hai use ta.ana na denā hai

ham soch kar ye ret kī taḳhtī pe likhte haiñ

ye imtihān ham ko dobāra na denā hai

tā-hashr is makān kā har ahl-e-qabr ko

tum kyā samajh rahe ho kirāya na denā hai

baiThe raho machān par āhū-e-shauq ko

bas dekhnā hai duur se bidkā na denā hai

waise hamara duniya se lena na dena hai

phir bhi jo mangti hai faqirana dena hai

ulTe sawal karti rahe hum se ye hayat

hum ne jawab to koi sidha na dena hai

agli dukan-e-ishq ka khata nahin khula

pichhli ka koi hum ko baqaya na dena hai

hum apna taj-o-taKHt uThaenge soch kar

miTTi ko jo bhi dena hai shahana dena hai

kahiyo kabhi akele mein wo nama-bar mile

gali na deni hai use tana na dena hai

hum soch kar ye ret ki taKHti pe likhte hain

ye imtihan hum ko dobara na dena hai

ta-hashr is makan ka har ahl-e-qabr ko

tum kya samajh rahe ho kiraya na dena hai

baiThe raho machan par aahu-e-shauq ko

bas dekhna hai dur se bidka na dena hai