waise to bahut dhoya gaya ghar ka andhera

vaise to bahut dhoyā gayā ghar kā añdherā

niklā nahīñ dīvār ke andar kā añdherā

kuchh ruashnī-e-tab.a zarūrī hai vagarna

hāthoñ meñ utar aatā hai ye sar kā añdherā

vo hukm ki hai aql-o-aqīde pe muqaddam

chhuTne hī nahīñ detā muqaddar kā añdherā

kyā kyā na abul-haul tarāshe ga.e us se

jaise ye añdherā bhī ho patthar kā añdherā

detī hai yahī vaqt kī tauret gavāhī

zar kā jo ujālā hai vo hai zar kā añdherā

har aañkh lagī hai ufuq-e-dār kī jānib

sūraj se kiran māñgtā hai Dar kā añdherā

waise to bahut dhoya gaya ghar ka andhera

nikla nahin diwar ke andar ka andhera

kuchh ruashni-e-taba zaruri hai wagarna

hathon mein utar aata hai ye sar ka andhera

wo hukm ki hai aql-o-aqide pe muqaddam

chhuTne hi nahin deta muqaddar ka andhera

kya kya na abul-haul tarashe gae us se

jaise ye andhera bhi ho patthar ka andhera

deti hai yahi waqt ki tauret gawahi

zar ka jo ujala hai wo hai zar ka andhera

har aankh lagi hai ufuq-e-dar ki jaanib

suraj se kiran mangta hai Dar ka andhera