waise to ham-safar hain sabhi raston mein log

vaise to ham-safar haiñ sabhī rāstoñ meñ log

lekin bañTe hue haiñ ka.ī qāfiloñ meñ log

chehra agarche apnā nahīñ dūsre kā hai

ḳhush phir bhī 'aks dekh ke haiñ ā.inoñ meñ log

achchhā hai duur abhī jo haqā.eq nazar se haiñ

jī leñge thoḌī der yūñhī āsroñ meñ log

shab ko diye jalānā bujhā denā sub.h ko

masrūf rāt-din haiñ inhīñ mashġhaloñ meñ log

sab jānte haiñ kaun hai qātil zamāne meñ

laate haiñ aisī baat kahīñ tazkaroñ meñ log

ye rāh-e-haq ye jāda-e-'irfān-o-āgahī

maare ga.e haiñ jaañ se inhīñ rāstoñ meñ log

'mohsin' ye dasht-e-jāñ kā safar sair-e-gul nahīñ

chal to paḌe haiñ ghar se baḌe valvaloñ meñ log

waise to ham-safar hain sabhi raston mein log

lekin banTe hue hain kai qafilon mein log

chehra agarche apna nahin dusre ka hai

KHush phir bhi 'aks dekh ke hain aainon mein log

achchha hai dur abhi jo haqaeq nazar se hain

ji lenge thoDi der yunhi aasron mein log

shab ko diye jalana bujha dena subh ko

masruf raat-din hain inhin mashghalon mein log

sab jaante hain kaun hai qatil zamane mein

late hain aisi baat kahin tazkaron mein log

ye rah-e-haq ye jada-e-'irfan-o-agahi

mare gae hain jaan se inhin raston mein log

'mohsin' ye dasht-e-jaan ka safar sair-e-gul nahin

chal to paDe hain ghar se baDe walwalon mein log