wajd mein zabta-e-raqs nahin TuTega

vajd meñ zābta-e-raqs nahīñ TūTegā

kuchh bhī ho silsila-e-raqs nahīñ TūTegā

aa ga.e na.ara-e-mastāna lagāne vaale

ab kabhī qā.eda-e-raqs nahīñ TūTegā

raqs-e-darvesh meñ darvesh hī shāmil hoñge

aur koī zāviya-e-raqs nahīñ TūTegā

ḳhirqa-poshoñ se kaho aaya hai phir mausam-e-raqs

ya.anī ab hausla-e-raqs nahīñ TūTegā

kū-e-jānāñ se ham āshufta-mizājoñ kā kabhī

sāthiyo rābta-e-raqs nahīñ TūTegā

raqs-e-darvesh hai ye ġhamza-e-raqqās nahīñ

dosto dā.era-e-raqs nahīñ TūTegā

dil kī pāzeb kī jhankār meñ kho bhī jaao

zindagī bhar nasha-e-raqs nahīñ TūTegā

'hāshmī' raqs vo āġhāz kiyā hai ham ne

ab kabhī silsila-e-raqs nahīñ TūTegā

wajd mein zabta-e-raqs nahin TuTega

kuchh bhi ho silsila-e-raqs nahin TuTega

aa gae nara-e-mastana lagane wale

ab kabhi qaeda-e-raqs nahin TuTega

raqs-e-darwesh mein darwesh hi shamil honge

aur koi zawiya-e-raqs nahin TuTega

KHirqa-poshon se kaho aaya hai phir mausam-e-raqs

yani ab hausla-e-raqs nahin TuTega

ku-e-jaanan se hum aashufta-mizajon ka kabhi

sathiyo rabta-e-raqs nahin TuTega

raqs-e-darwesh hai ye ghamza-e-raqqas nahin

dosto daera-e-raqs nahin TuTega

dil ki pazeb ki jhankar mein kho bhi jao

zindagi bhar nasha-e-raqs nahin TuTega

'hashmi' raqs wo aaghaz kiya hai hum ne

ab kabhi silsila-e-raqs nahin TuTega