wajh-e-qarar-o-rahat-e-dil-zadagan hai tu ki main

vaj.h-e-qarār-o-rāhat-e-dil-zadagāñ hai tū ki maiñ

lafz-e-yaqīñ hai tū ki maiñ harf-e-gumāñ hai tū ki maiñ

terā bhī āstāñ vahī merā bhī āshiyāñ vahī

us kī sahar hai tū ki maiñ us kī azaañ hai tū ki maiñ

jis kī tarāsh ke liye ḳhud ko lahū lahū kiyā

ab usī rahguzār kā sañg-e-girāñ hai tū ki maiñ

apnī ḳhabar se be-ḳhabar apnī hī zaat se mafar

apnī hī dāstāñ kā ik harf-e-ziyāñ hai tū ki maiñ

jis kī nazar meñ ḳhaar hai arz-e-vatan kī aabrū

us kā hadaf hai tū ki maiñ us kī kamāñ hai tū ki maiñ

wajh-e-qarar-o-rahat-e-dil-zadagan hai tu ki main

lafz-e-yaqin hai tu ki main harf-e-guman hai tu ki main

tera bhi aastan wahi mera bhi aashiyan wahi

us ki sahar hai tu ki main us ki azan hai tu ki main

jis ki tarash ke liye KHud ko lahu lahu kiya

ab usi rahguzar ka sang-e-giran hai tu ki main

apni KHabar se be-KHabar apni hi zat se mafar

apni hi dastan ka ek harf-e-ziyan hai tu ki main

jis ki nazar mein KHar hai arz-e-watan ki aabru

us ka hadaf hai tu ki main us ki kaman hai tu ki main