wajh-e-rangini-e-hayat gai

vaj.h-e-rañgīnī-e-hayāt ga.ī

tum ga.e saarī kā.enāt ga.ī

mausam-e-gul hai fasl-e-jāma-darī

ehtiyāj-e-takallufāt ga.ī

jab se lazzat-kash-e-jafā hai dil

hājat-e-chashm-e-iltifāt ga.ī

sub.h tak muntazir rahe anjum

tum na aa.e tamām raat ga.ī

baḌh gayā aur rañg-e-istiġhnā

dard-e-dil kah ke apnī baat ga.ī

un kī āñkhoñ se Dhal paḌe aañsū

māya-e-husn kī zakāt ga.ī

lab-e-naushīn-e-yār kī ḳhātir

dil se shīrīni-e-hayāt ga.ī

āshiqī ke qimār-ḳhāne meñ

jo bhī baazī lagā.ī maat ga.ī

wajh-e-rangini-e-hayat gai

tum gae sari kaenat gai

mausam-e-gul hai fasl-e-jama-dari

ehtiyaj-e-takallufat gai

jab se lazzat-kash-e-jafa hai dil

hajat-e-chashm-e-iltifat gai

subh tak muntazir rahe anjum

tum na aae tamam raat gai

baDh gaya aur rang-e-istighna

dard-e-dil kah ke apni baat gai

un ki aankhon se Dhal paDe aansu

maya-e-husn ki zakat gai

lab-e-naushin-e-yar ki KHatir

dil se shirini-e-hayat gai

aashiqi ke qimar-KHane mein

jo bhi bazi lagai mat gai