wajud-e-barq zaruri hai gulsitan ke liye

vajūd-e-barq zarūrī hai gulsitāñ ke liye

payām laatī hai tā'mīr āshiyāñ ke liye

azal se tā-ba-qayāmat sukūñ nahīñ miltā

mire nasīb kī gardish hai āsmāñ ke liye

ye aur baat hai phūloñ kā tañg dāman hai

bahāreñ phirtī haiñ betāb gulsitāñ ke liye

na pūchh hāl-e-dil-e-zār ham-nashīñ mujh se

kaleja chāhiye patthar kā rāzdāñ ke liye

mirā aur un kā ta'alluq hai is tarah jaise

zabāñ dahan ke liye hai dahan zabāñ ke liye

mirī jabīñ se tirā āstāñ na chhūTegā

ki ye banī hai tire sañg-e-āstāñ ke liye

ġhazab huā unhīñ tinkoñ pe gir paḌī bijlī

jinheñ sañbhāl ke rakkhā thā āshiyāñ ke liye

tirī talab meñ phirātā hai mujh ko dasht-ba-dasht

vo zauq-o-shauq jo rahbar hai kārvāñ ke liye

ḳhudā ke sāmne jaanā paḌegā ḳhālī haath

ki 'shams' jam.a na kar paa.e kuchh vahāñ ke liye

wajud-e-barq zaruri hai gulsitan ke liye

payam lati hai ta'mir aashiyan ke liye

azal se ta-ba-qayamat sukun nahin milta

mere nasib ki gardish hai aasman ke liye

ye aur baat hai phulon ka tang daman hai

bahaaren phirti hain betab gulsitan ke liye

na puchh haal-e-dil-e-zar ham-nashin mujh se

kaleja chahiye patthar ka raazdan ke liye

mera aur un ka ta'alluq hai is tarah jaise

zaban dahan ke liye hai dahan zaban ke liye

meri jabin se tera aastan na chhuTega

ki ye bani hai tere sang-e-astan ke liye

ghazab hua unhin tinkon pe gir paDi bijli

jinhen sanbhaal ke rakkha tha aashiyan ke liye

teri talab mein phiraata hai mujh ko dasht-ba-dasht

wo zauq-o-shauq jo rahbar hai karwan ke liye

KHuda ke samne jaana paDega KHali hath

ki 'shams' jama na kar pae kuchh wahan ke liye