wajud us se hamara kahin juda na lage

vajūd us se hamārā kahīñ judā na lage

vo saath saath rahe aur hameñ patā na lage

vaqār meñ jo izāfa hai aap ko manzūr

sañbhal ke chaliye jahāñ kī kahīñ havā na lage

fareb-o-makr pe in.aam log paate haiñ

maiñ baat sach bhī kahūñ aur tāziyāna lage

hamārī zaat se pahle gurez thā us ko

ab e'tirāf-e-navāzish use burā na lage

ilāhī tujh se guzārish hai baar baar yahī

mire sanam ko kisī kī bhī badduā na lage

jazīra dil kā hai suunā tumhārī yaad baġhair

chale bhī aao ki mausam baḌā suhānā lage

vo bhuul saktā hai ai 'dāġh' mujh ko jald magar

use bhulāne meñ shāyad mujhe zamāna lage

wajud us se hamara kahin juda na lage

wo sath sath rahe aur hamein pata na lage

waqar mein jo izafa hai aap ko manzur

sanbhal ke chaliye jahan ki kahin hawa na lage

fareb-o-makr pe inam log pate hain

main baat sach bhi kahun aur taziyana lage

hamari zat se pahle gurez tha us ko

ab e'tiraf-e-nawazish use bura na lage

ilahi tujh se guzarish hai bar bar yahi

mere sanam ko kisi ki bhi baddua na lage

jazira dil ka hai suna tumhaari yaad baghair

chale bhi aao ki mausam baDa suhana lage

wo bhul sakta hai ai 'dagh' mujh ko jald magar

use bhulane mein shayad mujhe zamana lage