waqf-e-nigah-e-naz mera dil na ho saka

vaqf-e-nigāh-e-nāz mirā dil na ho sakā

ye aa.ina bhī un ke muqābil na ho sakā

āshuftagī-e-'ishq kā hāmil na ho sakā

yā'nī koī harīf-e-ġham-e-dil na ho sakā

be-gāngī-e-'ishq kā 'ālam na pūchhiye

koī sharīk-e-bekasī-e-dil na ho sakā

jis meñ ki terī yaad se ġhāfil rahā huuñ maiñ

vo lamha merī ziist meñ shāmil na ho sakā

kānoñ meñ itne paas se aa.ī sadā-e-dost

mujh ko yaqīn-e-dūrī-e-manzil na ho sakā

jab tak junūn-e-'ishq kī shorish na miT ga.ī

dil un kī bazm-e-nāz ke qābil na ho sakā

yuuñ to ḳhushī bhī qabza-e-qudrat meñ thī magar

ġham ke baġhair takmila-e-dil na ho sakā

waqf-e-nigah-e-naz mera dil na ho saka

ye aaina bhi un ke muqabil na ho saka

aashuftagi-e-'ishq ka hamil na ho saka

ya'ni koi harif-e-gham-e-dil na ho saka

be-gangi-e-'ishq ka 'alam na puchhiye

koi sharik-e-bekasi-e-dil na ho saka

jis mein ki teri yaad se ghafil raha hun main

wo lamha meri zist mein shamil na ho saka

kanon mein itne pas se aai sada-e-dost

mujh ko yaqin-e-duri-e-manzil na ho saka

jab tak junun-e-'ishq ki shorish na miT gai

dil un ki bazm-e-naz ke qabil na ho saka

yun to KHushi bhi qabza-e-qudrat mein thi magar

gham ke baghair takmila-e-dil na ho saka