waqt-e-aKHir kaam jazb-e-na-tamam aaya to kya

vaqt-e-āḳhir kaam jazb-e-nā-tamām aayā to kyā

hichkiyoñ kī shakl meñ un kā payām aayā to kyā

rah ga.ī rindoñ meñ jab sāġhar uThāne kī na taab

ab taġhāful-āshnā sāqī-ba-jām aayā to kyā

vaqt hī par le ke ubhregā payām-e-sub.h-e-nau

Dūbte sūraj ko tāroñ kā salām aayā to kyā

lutf to jab hai ki jalva ho ba-qadr-e-zarf-e-dīd

ban ke barq-e-tūr vo bālā-e-bām aayā to kyā

āftāb-e-sub.h ishrat kī ziyā.eñ aur haiñ

shām-e-ġham le kar agar māh-e-tamām aayā to kyā

mai-kada vīrāñ huā bezār mai-kash ho chuke

ab agar saaqī ba-husn-e-intizām aayā to kyā

rah gayā qaa.em zuleḳhā-e-mohabbat kā vaqār

yūsuf-e-ma.asūm par gar ittihām aayā to kyā

uḌ chukī jab niiñd āñkhoñ se ba-faizān-e-junūñ

ab sahar aa.ī to kyā hangām-e-shām aayā to kyā

baat to jab thī ki rahte hosh meñ apne kalīm

jalva kho jaane pe andāz-e-kalām aayā to kyā

waqt-e-aKHir kaam jazb-e-na-tamam aaya to kya

hichkiyon ki shakl mein un ka payam aaya to kya

rah gai rindon mein jab saghar uThane ki na tab

ab taghaful-ashna saqi-ba-jam aaya to kya

waqt hi par le ke ubhrega payam-e-subh-e-nau

Dubte suraj ko taron ka salam aaya to kya

lutf to jab hai ki jalwa ho ba-qadr-e-zarf-e-did

ban ke barq-e-tur wo baala-e-baam aaya to kya

aaftab-e-subh ishrat ki ziyaen aur hain

sham-e-gham le kar agar mah-e-tamam aaya to kya

mai-kada viran hua bezar mai-kash ho chuke

ab agar saqi ba-husn-e-intizam aaya to kya

rah gaya qaem zuleKHa-e-mohabbat ka waqar

yusuf-e-masum par gar ittiham aaya to kya

uD chuki jab nind aankhon se ba-faizan-e-junun

ab sahar aai to kya hangam-e-sham aaya to kya

baat to jab thi ki rahte hosh mein apne kalim

jalwa kho jaane pe andaz-e-kalam aaya to kya