waqt-e-aKHir maut ke aasar dekh kar

vaqt-e-aḳhīr maut ke āsār dekh kar

ahbāb ro diye ruḳh-e-bīmār dekh kar

dohrāte haiñ vo sab se fasāna kalīm kā

duniyā ko apnā tālib-e-dīdār dekh kar

ek musht-e-par ke haq meñ use kitnī laag thī

sayyād ḳhush hai mujh ko giraftār dekh kar

duniyā ke be-qusūr qayāmat meñ bār-bār

pachhtā rahe haiñ shān-e-gunahgār dekh kar

ahbāb dil ko thaam ke bālīñ se uTh ga.e

baiThā gayā na sūrat-e-bīmār dekh kar

zindān-e-zauq-o-shauq meñ un kā asīr-e-‘ishq

chup-chāp ho gayā dar-o-dīvār dekh kar

'bismil' bhī qatl-gāh meñ dam bhar na ruk sake

chaltī huī kisī kī vo talvār dekh kar

waqt-e-aKHir maut ke aasar dekh kar

ahbab ro diye ruKH-e-bimar dekh kar

dohraate hain wo sab se fasana kalim ka

duniya ko apna talib-e-didar dekh kar

ek musht-e-par ke haq mein use kitni lag thi

sayyaad KHush hai mujh ko giraftar dekh kar

duniya ke be-qusur qayamat mein bar-bar

pachhta rahe hain shan-e-gunahgar dekh kar

ahbab dil ko tham ke baalin se uTh gae

baiTha gaya na surat-e-bimar dekh kar

zindan-e-zauq-o-shauq mein un ka asir-e-‘ishq

chup-chap ho gaya dar-o-diwar dekh kar

'bismil' bhi qatl-gah mein dam bhar na ruk sake

chalti hui kisi ki wo talwar dekh kar