waqt-e-ruKHsat jo koi ashk gira hota hai

vaqt-e-ruḳhsat jo koī ashk girā hotā hai

is se andāza-e-tajdīd-e-vafā hotā hai

mujh ko inkār kī aadat hai vagarna sāhib

aap kā hukm durust aur bajā hotā hai

zindagī aañkh jhapakte meñ guzar jaatī hai

kārvāñ vaqt kā tezī se chalā hotā hai

dastakeñ band kivāḌoñ pe diye jaate ho

jabki dar us kā har ik vaqt khulā hotā hai

in lakīroñ meñ sabhī Duub ga.iiñ tadbīreñ

kyā talātum mire hāthoñ meñ likhā hotā hai

rāsta ek hai sab qāfile vāloñ kā magar

uzr manzil pe pahuñchne kā judā hotā hai

ruuh tak jism se is tarah judā hotī hai

jaise qaidī koī zindāñ se rihā hotā hai

kaise kah duuñ ki vo maujūd nahīñ hai 'ādil'

raat din tū jise paane meñ lagā hotā hai

waqt-e-ruKHsat jo koi ashk gira hota hai

is se andaza-e-tajdid-e-wafa hota hai

mujh ko inkar ki aadat hai wagarna sahib

aap ka hukm durust aur baja hota hai

zindagi aankh jhapakte mein guzar jati hai

karwan waqt ka tezi se chala hota hai

dastaken band kiwaDon pe diye jate ho

jabki dar us ka har ek waqt khula hota hai

in lakiron mein sabhi Dub gain tadbiren

kya talatum mere hathon mein likha hota hai

rasta ek hai sab qafile walon ka magar

uzr manzil pe pahunchne ka juda hota hai

ruh tak jism se is tarah juda hoti hai

jaise qaidi koi zindan se riha hota hai

kaise kah dun ki wo maujud nahin hai 'adil'

raat din tu jise pane mein laga hota hai