waqt jaisa hai ba-har-taur guzar jaana hai

vaqt jaisā hai ba-har-taur guzar jaanā hai

aaj jo zinda haqīqat hai kal afsāna hai

kab jalī sham-e-tamannā hameñ kuchh yaad nahīñ

itnā ma.alūm hai jal kar use bujh jaanā hai

merī vahshat ne abhī paañv nikāle bhī na the

dil-e-be-tāb ne zid kī mujhe ghar jaanā hai

vā agar bāb-e-muravvat ko nahīñ hai honā

aaj hī kah deñ jo kal aap ko farmānā hai

gardish-e-vaqt kā ye jabr hai shāyad jo log

sub.h zinda haiñ magar shaam ko mar jaanā hai

chashm-e-bīnā pe lagī tohmat-e-nazzāra yūñhī

had-e-idrāk talak tār-e-nazar jaanā hai

ġharq honā na kahīñ ḳhvāb-e-farāmoshī meñ

muñh añdhere hī tumheñ 'rāhī' agar jaanā hai

waqt jaisa hai ba-har-taur guzar jaana hai

aaj jo zinda haqiqat hai kal afsana hai

kab jali sham-e-tamanna hamein kuchh yaad nahin

itna malum hai jal kar use bujh jaana hai

meri wahshat ne abhi panw nikale bhi na the

dil-e-be-tab ne zid ki mujhe ghar jaana hai

wa agar bab-e-murawwat ko nahin hai hona

aaj hi kah den jo kal aap ko farmana hai

gardish-e-waqt ka ye jabr hai shayad jo log

subh zinda hain magar sham ko mar jaana hai

chashm-e-bina pe lagi tohmat-e-nazzara yunhi

had-e-idrak talak tar-e-nazar jaana hai

gharq hona na kahin KHwab-e-faramoshi mein

munh andhere hi tumhein 'rahi' agar jaana hai