waqt ka kya hai taqaza nahin dekha jata

vaqt kā kyā hai taqāzā nahīñ dekhā jaatā

ishq meñ adnā-o-a.alā nahīñ dekhā jaatā

ek hī vaqt meñ mil jaa.e to pīchhā chhūTe

zindagī bhar kā sulagnā nahīñ dekhā jaatā

ye shab-o-roz ye mausam ye badalte manzar

rāt-din kā ye tamāshā nahīñ dekhā jaatā

aa.ina dekh ke ham ḳhud ko na pahchān sake

apne chehre kā bikharnā nahīñ dekhā jaatā

jaane hālāt hameñ aur dikhā.eñ kyā kyā

nasl-e-nau kā ye bahaknā nahīñ dekhā jaatā

sho.abada-bāz siyāsat se to baaz aa.e ham

kyā kareñ ham se dikhāvā nahīñ dekhā jaatā

'shauq' us ḳhvāb kī ta.abīr milī hai aisī

ab koī ḳhvāb suhānā nahīñ dekhā jaatā

waqt ka kya hai taqaza nahin dekha jata

ishq mein adna-o-ala nahin dekha jata

ek hi waqt mein mil jae to pichha chhuTe

zindagi bhar ka sulagna nahin dekha jata

ye shab-o-roz ye mausam ye badalte manzar

raat-din ka ye tamasha nahin dekha jata

aaina dekh ke hum KHud ko na pahchan sake

apne chehre ka bikharna nahin dekha jata

jaane haalat hamein aur dikhaen kya kya

nasl-e-nau ka ye bahakna nahin dekha jata

shoabada-baz siyasat se to baz aae hum

kya karen hum se dikhawa nahin dekha jata

'shauq' us KHwab ki tabir mili hai aisi

ab koi KHwab suhana nahin dekha jata